رحلَتيَ مَع الطَفَشَ

8
8
8

البنت اللي على اليسار أنا خخخخخخخخخخخخخخ
.
.
.
.

تصدقون أمس بالليل ماجاني نوم قاعده بلحالي وطفشانه موت
عاد أنا إذا طفشت أروح آكل حلى يقولون إنه يوخر الطفش
بس أمس مااشتهيت شي أحس راسي مصدع مالي خلق حتى آكل
قعدت أدور في البيت
أدّور شي أسويه ... مالقيت شي

قلت بروح للسطح << مخاطره الأخت
وطبعا تعرفون السطح فيه مخزن مليان قرابيع وأشياء مانستعملها
المهم وأنا بالدرج راقيه للسطح سمعت صوت
و انهبل ياربي مافيه أحد قايم من وين هالصوت

وأوقف بمكاني شوي..
أبي أحدد الصوت جاي منين...
ومع تركيز شديد اكتشفت إن الصوت جاي من السطح

خفت...ونزلت راسي للأرض..
وشفت صورتي منعكسه على و افز و انهبل زود

وفي هذه الأثناء وأنا منزله راسي...
قلت لصورتي اللي على الرخام وش رايك أرجع لغرفتي
بس اكيد هذا حرامي متخبي بالسطح

قالت صورتي : انطمي بس حرامي ومتخبي بالسطح
ياربي وش هالذكاء ...ضفي وجهك مناك لابوتس لابو من خلاني صورتك

عقب ماهزأتني قلت والله لاأوريها أم كشه
تشوف ان ماصرت روبن هود ورقيت للسطح وقتلت الحرامي ماأكون انا وفيت
واستجمع قواي واكمل وأرقى الدرج وأنا مغمضه لين وصلت السطح
صرت اسمع الصوت قريب
وقعدت امشي اتبع مصدر الصوت لين صقع راسي بباب المخزن
يوه اثر الصوت جاي من هالمخزن

وش أسوي طيب
أفتح الباب وأدخل المخزن وأشوف من اللي فيه
والا اقعد أتسمع لين أطلع بسالفه << لاعبت فيها اللقافه

قلت خل اشوف من تحت الباب وأضرب عصفورين بحجر منها أسمع ومنها أشوف
وأنا اللي انسدح تحت الباب وأشوف
ماتصدقون لو اقولكم وش شفت

شفت التبسي
ايه التبسي ماغيره شفته واقف فوق شنطة الحديد ويحكي على باقي الأغراض
ترى التبسي أظنه الصحن الحديد الدائري
ويقول:
الى متى بنبتل مجدوعين في هالمخزن
متى بناخذ حقوقنا كامله متى بنرجع لسابق عهدنا
ايييييييييييه وين زمان اول ايام ماكانوا الناس بالعزايم تبسي رايح وتبسي جاي
وحتى بغداهم وعشاهم ...ماياكلون بغير التباسي
وماكان يهنى لي الأكل الا مع بعض
وكان الأكل بالتبسي دليل على التلاحم والترابط بينهم
يقعدون حوله مع بعض ويسولفون مع بعض...

اما الحين ...
الناس تفرقوا
وكلن صار ياكل بصحن لحاله ومايدري عن الثاني يالله لك الحمد
ويقولون ليش تغيرنا وماصرنا مترابطين زي اول

واعلموا أخواني
أن الأكل بالتبسي فيه من الديموقراطيه والحريه الشيء الكثير...
كيف ذلك؟.؟
ان التبسي ماهو إلا صحن كبير مدور
يجلسون من حوله بالتساوي
ويسولفون على اللي يبون لأنهم قاعدين دائره مب شرط
مايسولف الواحد الا على اللي جنبه زي الطاوله
ويعني مثل مجلس الأمن تلاحظون إن طاولتهم مدوره
يعني محد أحسن من احد كلهم زي بعض
وحنا معشر التباسي رمز من رموز الثقافه في هذه البلد
... ويجب أن نكافح ضد الإندثار

وعلشان نرجع لسابق عهدنا لازم نحارب أعدائنا
واولهم السندوتشات
وعلى رأس السندوتشات الهمبرجر والخبز بجبن والاندومي<< جاي عرض
حرام هالأكل يوكل بأي وقت حتى الواحد لويشوفونه يفطر همبرجر محد استنكر
أجيال صارت بلاصحه
كل هذا بسبب اندثار عادتنا الغذائيه

يجب أن نقود مظاهره
مانقدر نسكت أكثر من كذا خلاااااااااااص ااااااااااااااص ااااااااااااص
<< آآآآه على الصدى شوي وأصيح

يوم خلص التبسي كلمته ونزل عن الشنطه
ويستلج المخزن
وقامو التباسي كلهم يصرخون و يصبخون بارواحم تعبير عن التأييد والتشجيع
وشوفوا عاد الإزعاج ذيك اللحظه

شوي...ويجي الملاس الكبير وكان هو منظم الإجتماع...

قال:
الآن نترككم أعزائي المنكوبين مع كلمة الآنسه دله
ونزل عن الشنطه

وتجي دلة السيف </A>تمشي بدلع
ويوم جت ترقى على الشنطه وترفع طرف فستانها يقالك نعومه انكخخخخخخخ

المهم وتبدأ كلمتها بصياح
أنا...أنا الدله رمز الكرم والأصاله << أصاله والا باسكال
أنا رمز العروبه أنا بنت الحمايل ...أنايصير فيني كذا
إذا طلعنا من هنا أبوي ماراح يسكت
بيوصلها لحماية المستهلك
لكن أناأوريهم أنا أأدبهم

في هذه اللحظه قاطعهاإبريق الكشته وقال:
اخلصي علينا بلا مصاله...عندك علمن سنع قوليه
ماعندتك شي ضفي خلينا ننام << عربجي هالإبريق

حز في خاطرها كلام إبريق الكشته وزعلت ونزلت
وقالت خلو دله غيري تتكلم أنا مصدومه
رقت دله ثانيه وبدت كلامها الذي لايخلو أيضاً من المصاله بس أهون من ذيك

قالت:
حنا قبيلة الدلال...غنيه عن التعريف
أجدادنا كانوا كنايةعن الكرم والسخاء
ونحن من تغنى بجمالنا الشعراء
وكتبت فينا القصص والروايات
وقهوة العربي رمز إكرام الضيف<< ماقلنا اكتبي تعبير عن الدله
وكل شي فينا له عادات وأصول... حتى طريقة الشيل والصب
لكن وين هالعادات والأصول في هالزمن كل شي رااااح
صاروا مايطبخوننا الا بالمناسبات...
واستغنوا عنا بالنسكافيه ذا الماصله
اول مره اشوف قهوه ماتطبخ
صدق انها رقله يصبون عليها مويه ويقولون صيري قهوه وتصير...
وش ذا

ايييييييييييييييه بس
الا ليت المبطي يعود يوماً لكي أموت بذاك الزماني<< مايمديكم على الشعر
حنا على آخر الزمن نجدع في مخزن بالسطح صدق لاقالوا هالزمن زمن شسمه
لا وذاك اليوم بزارينهم يلعبون بنا قهوه
حاطين بنا عصير لا ويلزمون على بعض بعد من جد هزلت
طيب مايبوننا يبيعوننا أو يحطوننا بالمطبخ على الأقل نتفرج على الناس

أما نقعد على هالحال مستحيل مستحيل...
إلى هنا انتهى كلام الدله ونزلت وسط تصفيق وضجيج صار في المخزن

رقى الملاس مره ثانيه على الشنطه<< يابثره
قال والآن مع كلمة إبريق الكشته
ورقى واحد أسود صاير فحمه لاعبن به السنا
وقال : حنا رجال وراعين بر
آخر مالنا مجدوعين بمخزن مع شلة خكرنه
مايصير الكلام ذا!! وين حقوق الأباريق
لا وذاك اليوم نزلوني للمطبخ بيطبخون بي شاهي ويحطون بي ليبتون
يافضيحتي بين العربان ليبتون
وأنا اللي أجدع نفسي لين انكب الشاهي
مابقى الا هي أنا إبريق الكشته ينحط بي ليبتون
أنا ولد رجال مكاني البر وراعين البر
بس مدري وش جابني هنا ووش خلى هالناس يشتروني
لكن أنا ناوي الهجره بإذن الله مع أقرب كشته ماني راجع
بروح لاجيء عند أي ضب لين القى لي أهل
قاطع كلام الإبريق بياله صغيره
وحنا بعد يابروقي ماعاد لنا مكان في هالبيت خلاص ماعاد يبوننا"صوت واحد صوته صغير"
أنا بياله بادريق الحين محد يبيني
يبون صحن وملعقه وياخذون السكر بالبياله
انا مالي مكان في زمن العولمه يبون بياله تحكي انجليزي ومعها شهادة خبره

واستلجوا كل اللي بالمخزن...وصاروا كلهم يرددون مالنا مكان في زمن العولمه
حتى الشنطه الحديد اللي من أول الإجتماع وهي نايمه
قامت تردد معهم وهي ماتردي وش السالفه

مالنا مكان في زمن العولمه...
مالنا مكان في زمن العولمه...
مالنا مكان في زمن العولمه...

في هالوقف قام الملاس وطق براسه ثلاث طقات على الشنطه...طق...طق...طق

وقال:
اسمعوني هذا اللي قاعد يصير في العالم شي خطير<< ياحليله يتفلسف ويقولون ليش كثرت العادات السيئه والامراض الشينه

لازم ننبه الناس ونرجعهم لثقافتهم العربيه الأصيله
أنا يوم سمعت الملاس بدا يتفلسف تحمست وفتحت الباب
ابي أشاركهم بالحوار واتفلسف على العولمه والأمركه

بس إني أول مادخلت المخزن لقيت كل شي بمكانه
ولا كأنهم قبل شوي مسوين ضجه

قعدت أحكي ماردوا علي
رحت لمهم واحد واحد رحت للتبسي والدله والإبريق
ابي أحد يكلمني محد رد

ضاق صدري مره..
وطلعت ...
نزلت من السطح ...
ورحت لغرفتي ورجعت
أدور حلى ..
.
.
.
.
هذا كل مالدي
مشكورين لأنكم اضعتم جزء من وقتكم الثمين في قراية هذه الخمبقه
تقبلوا مصالتي قبل تحيتي
.
.
"سبحانك اللهم وبحمدك,, أشهد أن لا اله إلا أنت,,أستغفرك وأتوب إليك

م
ن
ق
و
ل

ههههههههههههههههههههه

دوؤوؤوؤومَزَ الضحَحَكَهَ
مَنوؤووؤورَه