انا كنت مصيبة

السلام عليكم ورحمة الله وبركاته

عاملين ايه يا ؟؟

ان شاء الله يارب تكونوا في احسن حال و فرحانيين يارب

طبعا انتوا داخلين عشان تشوفوا ايه اللي انا عملتوا في ماما وانا في تانية ابتدائي

ماشي يا ستي انتي وهيا انا هقولكوا

وانا بقلب في الكراتين اللي انا بحط فيها كتب وكراسات السنين اللي فاتت لقيت كراسة المذكرات بتاعتي

من وانا في سنة تانية ابتدائي انا بقي قلت ياااااه دي قديمة اوي قلت لما افتح واشوفها واعيد الذكريات بتاعتي

فتحت لقيت مكتوب فيها : انا إمبارح عملت مقلب في ماما فظيع اوي ماما اتخضت حتت خضة

انا وانا في البانيو (شوفتوا وانا في البانيو دي ههههههه اول جملة قعدت اضحك فيها علي نفسي) قعدة

بستحمي قعدت العب في البانيو شوية وقعدة بعمل تمثلية اني بغرق وفي ساحرة شريرة بتشفطني

مع الماية اللي بتتشفط في البلاعة (شوفتوا كنت هبلة إزاي ههههه) كنت طولت في اللعب اوي فقلت اما اغسل

شعري بقي عشان ماما متزعقليش ( اصل كنت انا وماما ساعتها اللي كنا قاعدين في الشقة لوحدنا ) كنت

جاية بغسل شعري لقيت الماية كلها بقي لونها احمر في احمر انا اتخضيت و بعدين اكتشفت ان الشامبو

لونو احمر عامل زي الدم (اصل وانا بستحمي مدققتش اوي فاللون ههههه عبيطة بقي تقولو ايه)

فجتلي فكرة اني اعمل مقلب في ماما فرحت جايبة الشامبو ده وبعدين حطيتو علي راسي من علي الجنب

كان عامل زي الدم فرحت مغرقة بقيت جسمي عشان يبان ده دم بجد واني اتعورت بقي والمقلب ينجح

رحت بعد كده صوت و جبت إزازة الشامبو ورزعتها في البانيو عشان يعمل اكني وقعت ودماغي اتخبطت و

جابت دم بقي وغرق البانيو بقي وكدة ماما دخلت عشان تشوف في ايه لقيتني واقعة في البانيو و الماية حمرا

وجسمي غرقان دم ماما راحت مصوتة وراقعة بالصوووت وكانت خلاص هتعيط و قاعدة عمالة بتقول يالهوووووووي

الحقوني بنتي اغمي عليها و احنا كنا في نص الليل والناس نايمة وبعدين رحت قمت وقلتلها وضحكت عليكي

وقعدت اضحححك ماما وشها ده عمل زي توم و جيري و ودانها طلعت دخان وقعدت تجري ورايا فالشقة كلها

وانا كل ده ملبستش اي حاجة (ياكسووفيي) وبعدين راحت مسكتني واديتني حتت علقة

اسخن من السخنة اللي اي بني آدم بياخدها ( يا عيني عليا انا دقيقة في تعبير) وانا جسمي معلم

لحد دلوقتي من العلقة بتاعت إمبارح المهم كان مقلب ابيض في اوله لكن اسود في اخره

*********

شوفتوا بقي انا مصيبة إزاي يلا كل واحدة تكتب اي مقلب عملته او اتعمل فيها

استني هنا رايحة فيين اكتبي رد و قيمي لحسن هبقي زعلانة منك لأخر السنة واحسنلك خليكي

لطيفة وردي وقيمي علشان مجيبش ماما تيجي تأكلك العلقة اللي شربتها وانا في تانية ابتدائي

واحسنلك بلاااش تجربي زعلي علشان انا وعلي وحش جداا انا بقولك اهو

يـــــــــ السلام ختام ـــــــــلا

مشكوره