بسم الله الرحمن الرحيم
***********
طبعا اخطاء الحروف بيكون سببها الاهل نتيجة اهمالهم تصحيح النطق لاولادهم ويسببوا لهم الحرج
طول عمرهم
اولا قصة زميلى فى الابتدائى وحرف الراء والزين
*************
كان لى زميل فى الابتدائى معظم حروفه غلط ومرة طلعنا رحلة والمشرفة قالت مين يغنى هو رفع ايده وراح مغنى لمحمد منيرولعلع بقى
(سفينة يسيت عى المينا فيها صبية حسينة ولفين يا سبة ولفين يا سبة يا ام العيون الحسينة)
طبعا عمرى ما انسى ابداوياترى لسة بينطق غلط والا صح
بنتى و حرف الكاف
************
ربنا مش بيسيب لما خلفت
كانت بنتى وهى صغيرة كانت بتنطق الكاف تاف
ولما راحت الحضانة ده عملها مشكلة كانت تيجى كل يوم زعلانة وتقولى يا ماما الولاد تلهم بيقولوا (تاف ) و انا بس اللى بقول تاف (قصدها حرف كاف)
ومرة تانية قالت لى يا ماما الولاد تلهم بيقولوا ( توسة ) وانا نفسى اقول توسة ( الكوسة يعنى ) وكانت رفضة تروح الحضانة
كان عمها ساكن فوقنا مرة طلعت عنده وكنا فى العيد الصغير
قالت له يا عمو عايزة (تحت) قال لها ما انتى لسة جاية من تحت عايزة ليه تنزلى تانى
قالت له انا مش عايزة انزل تحت انا عايزة تحت ااتل تحت ااتل تحت وشورت على بقها (تحت يعنى كحك)
جوزى و حرف الصاد
******
اما جوزى بقى
مصمم ينطق سمير( صمير)
اقول له ايه صمير دى
يقولى عيزة راجل طويل عريض يقول سمير (ويقوم مرفع صوته)
انا يا ختى مش مايع
فاكر يعنى لما يقول سمير يبقى كدة بيدلع
ابنى والجبنة
*******
اما بقى الطامة الكبرى هى
ابنى وهو صغير
لما كان فى الحضانة بردو جه يوم وقالنا ما تودونيش الحضانة دى تانى قولت له ليه قالى الميس بتقول كلمة عيب وكمان بتقول قولوا ورايا
قولتله ليه يا حبيبى وما كانش راضى يقول ابداااااا لحد لما رضى اتصدمت طبعااااااااااا
طبعا هى كانت كلمة تشيز(جبنة بالانجليزى عشان اللى مش عارف) يعنى (بيحذف الشين)
انتو افهموا بقى
قولت له سمعت الكلمة دى فين قالى انه سمعها من ابن عمته لكن اللى ريحنى انه ما كانش راضى يقولها لانه فاهم انها غلط
وقعدت احفظه الكلمة واقول له لازم تنطقها تش تش تشييييييييييز لحد ما فهم
بنت الجيران وحرف الخاء
********************
بنت الجيران كانت بتنطق الخاء حاء ودى نادرة شوية
جت لاختى قالت لها (حالتو ماما بتقولك عايزة شوية محلل) الترجمة بقى (خالتو ماما بتقولك عايزة شوية مخلل)
خالتى و حرف الفاء
************
حكاية حالتى قصدى خالتى
كانت مرة بتعمل لينا كحك العيد وبعتت اخويا يجيب الطلبات راح يا عينى يجيب جاب كله
لكن فى حاجة مش لاقيها لما جه قالت له بكل ثقة فين يا ابنى (البانيليا) قالها انزلى هاتيها انتى كل لما اروح لحد يقولى مقيش حاجة اسمها كدة فى حاجة تانية اسمها فانيليا وبسرعة قالت له ايوة هى دى
زميل زوجى وحرف الشين والراء
*************
مرة كنت بشوف الاسامى اللى فى موبايل زوجى لقيت فى ضمن الاسماء كاتب اسم (السامى)
سالته مين ده قالى الشامى قولتله امال ليه كاتبه كدة قالى هو طول النهار فى الجمرك ينادى على العمال يقولهم
( اللى يستغل عند السامى لازم يستغل بحلالة )
يعنى اللى يشتغل عند الشامى لازم يشتغل بحرارة
صحبتى وحرف الشين
**************
يعنى صحبتى ديما لما تتكلم تشبك حرف الشين فى اى حرف يعجبها
يعنى لما تقولى تركواز تقولى (تشريكواز)
والبتنجان (بتشنجان)
شفتوا بقى ان الاهل بيجنوا على ولادهم من غير ما يحسوا
ايه رايكم بقى اللى اتعرض للحروف زى دى يحطها
ماتنسوش التقييم
موضوع: اضحكى على الحروف 
السبت يوليو 02, 2011 6:05 am
